चरिकोट - भूमि सम्बन्धी समस्या समाधान आयोग दोलखाको अध्यक्षको जिम्मेदारी धर्मेन्द मोक्तानले पाएका छन् । मन्त्रिपरिषदको बैठकले उनलाई भूमि सम्बन्धी समस्या समाधान आयोग दोलखाको अध्यक्षमा नियुक्त गरेको हो ।
उनी मेलुङ गाउँपालिका ४ भेड्पु निवासी हुन । आयोगको विज्ञमा गौरीशंकर गाउँपालिका ३ जुँगुका बद्री बहादुर बुढाथोकी र सदस्यमा बिगु गाउँपालिका ४ की गोमा केसी नियुक्त भएकी छन् ।
आयोगको अध्यक्षका लागि यसअघि नेताहरु शिवप्रसाद भण्डारी, गोपाल न्यौपाने पनि आकांक्षी रहेको चर्चा थियो ।
सरकारले ७७ वटै जिल्लाका भूमिहीन दलित र सुकुम्बासीलाई जग्गा उपलब्ध गराउन जिल्ला समिति गठन गरेको जनाएको छ । जसका लागि सरकारले ७७ वटै जिल्लामा २ सय ३१ जना जिल्ला समितिका पदाधिकारी नियुक्त गरेको छ । आयोगका जिल्ला अध्यक्षहरुले सरकारको प्रथम श्रेणी सहसचिव र सदस्यहरुले द्धितिय श्रेणी उपसचिव सरहको सेवा सुविधा पाउनेछन् ।
