काठमाण्डौं - टिकटकले १ मिनेटको समयलाई बढाएर अब तीन मिनेट लामो भिडिओ बनाउने मिल्नेगरी तयारी गरेको छ । लामो भिडियो बनाउने प्रयोगकर्ताहरुको रुचीलाई मध्येनजर गर्दै टिकटक कम्पनीले परीक्षण थालेको हो ।

टेक अखबार इनग्याजेटले चिनियाँ एप टिकटकले भिडिओको समयसीमा तीन मिनेट लामो बनाउन खोजिरहेको जनाएको छ । बुधबार सामाजिक सञ्जाल विश्लेषक म्याट नवर्राले टिकटकले पठाएको मेसेज आफ्नो ट्वीट मार्फत् सार्वजनिक गर्दै टिकटकका केही प्रयोगकर्तालाई परीक्षणका रूपमा तीन मिनेट लामो भिडिओ बनाउन सक्ने फिचर पाउने बताईएको छ ।

युवा पुस्तामाझ निकै लोकप्रिय बनेको टिकटकमा ६० सेकेन्ड लामो भिडिओ बनाउन सकिने फिचर छ । समय सीमा तीन मिनेट बनाएर टिकटकले आफ्ना प्रयोगकर्तालाई कयौं सिर्जनात्मक काम गर्न स्थान दिइरहेको इनग्याजेटले बताएको छ । टिकटकले भने यो विषयमा आफ्नो आधिकारिक धारणा सार्वजानिक गरिसकेको छैन ।
-एजेन्सीको सहयोगमा