चरिकोट — दोलखामा आगामी असोज ७ गतेबाट शैक्षिक संस्थामा पठनपाठन सुरु गरिने भएको छ । स्वास्थ्य सुरक्षाका सबै मापदण्ड अपनाएर आधारभुत र माध्यामिक तहको पठनपाठन सुचारु गर्ने निर्णय भएको हो ।
स्थानीय तहका जनप्रतिनिधिसहित मंगलवार बसेको जिल्ला शिक्षा समन्वय समितिको बैठकले स्वास्थ्य सुरक्षा मापदण्डसहित कार्ययोजना बनाएर आधारभुत र मावि तहको कक्षा संचालन गर्ने निर्णय गरेको हो ।
जिल्ला शिक्षा समिति अध्यक्ष तथा जिल्ला समन्वय समितिका प्रमुख डबल पाण्डेका अनुसार आधारभुत तहका विद्यार्थीलाई सिकाई केन्द्रको रुपमा टोलटोलमै पुगेर शिक्षकहरुबाट पठनपाठन गराईनेछ । यसैगरी ६ देखि १० कक्षासम्मका लागि भने विद्यालयमै कक्षा संचालन हुनेछ ।
तर कक्षा संचालन गर्ने क्रममा माक्स, सेनिटाईजर सहित स्वास्थ्य सुरक्षा मापदण्ड लागु गर्नुपर्नेछ । धेरै विद्यार्थी संख्या भएका विद्यालय र कक्षाको हकमा रोलनम्बर अनुसार जोरविजोर प्रणाली अनुसार विद्यार्थीलाई कक्षामा सहभागि गराईनेछ ।
तामाकोसी, शैलुंङ लगायतका स्थानीय तहले यसअघि नै शैक्षिक संस्था सुचारु गर्ने निर्णय गरिसकेका छन् । कोरोना भाईरस् (कोभिड १९) को महामारीका कारण ७ महिनादेखि शैक्षिक संस्था ठप्प छन् ।
