चरिकोट - दोलखाको कालिञ्चोक गाउपालिकामा जिरीका एक युवकको मृत्यु भएको छ । मृत्यु हुनेमा जिरी नगरपालिका वडा नम्बर ८ बैजनीका ३० वर्षिय लाल बहादुर योगी रहेका छन् ।

जिल्ला प्रहरी कार्यालयका अनुसार कालिञ्चोक गाउँपालिका वडा नम्बर नम्बर ९ सुन्द्रावती स्थित ससुराली गाउँमा घाँस काट्न जाँदा उनको मृत्यु भएको हो । जिल्ला प्रहरी कार्यालय दोलखाकी प्रहरी निरीक्षक रुक्शा बज्रचार्यले सोमवार दिउँसो घाँस काटने क्रममा रुकुबारी पाखामा लडेर उनको मृत्यु भएको हो । उनी करिब ३० मिटर तल खसेर गम्भिर घाईते भएका थिए ।

उपचारका लागि दोलखा अस्पताल ल्याउने क्रममा उनको बीच बाटोमै मृत्यु भएको हो । उनको शवलाई पोष्टमार्टमका लागि प्राथमिक स्वास्थ्य केन्द्र चरिकोटमा राखिएको र थप अनुसन्धान भैरहेको प्रहरीले जनाएको छ । स्थानीयका अनुसार श्रीमान र श्रीमती संगै घाँस काट्न गएका थिए ।