चौतारा — सिन्धुपाल्चोकको फुल्पिङकट्टीमा गएको पहिरोमा बेपत्ता ५ जनाको शव फेला परेको छ । अविरल वर्षापछि आएको पहिरोमा पुरिएर बेपत्ता भएका भोटेकोसी गाउँपालिका ४ फुल्पिङकट्टीका एकै परिवारका ५ जनाको शव फेला परेको हो ।
गत असार ३१ गते मध्येराती गएको पहिरोमा पुरिएर उनीहरु बेपत्ता भएका थिए । स्थानीय गेन्जेन शेर्पाका आमा ८५ वर्षीया सुमबुट्टी, श्रीमती ४० वर्षीया सेमसङ्ग, बहिनी ३५ वर्षीया साङ्मुसहित छोरी १४ वर्षीया छिरिङवाङ्गु र १६ वर्षीया याङ्जीको शव फेला परेको सिन्धुपाल्चोक प्रहरीले जनाएको छ ।
सिन्धुपाल्चोकका प्रहरी नायव उपरीक्षक माधव प्रसाद काफ्लेले गएको बिहीबार र पहिरो झरेको दिन गरी ३ जनाको शव फेला परिसकेको र बुधवार बाँकी दुईको पनि शव पुरिएको अवस्थामा फेला परेको जानकारी दिए । बेपत्ताहरुको खोजी कार्यमा सशस्त्र, नेपाली सेनासहित अन्य सुरक्षाकर्मी जनप्रतिनिधि, स्थानीय संयुक्त रुपमा जुटेका थिए ।
