चरिकोट —दोलखा भिमेश्वर नगरपालिकामा मोटरसाईकल दुर्घट्ना हुँदा २ जना घाईते भएका छन् । घाईते हुनेमा मोटरसाईकल चालक कालिञ्चोक गाउँपालिका वडा नम्बर ६ का ३३ वर्षिय ईन्द्र बहादुर बस्नेत र भीमेश्वर नगरपालिका वडा नम्बर १ सुस्पाक्षमावतीका बृहस्पती थामी रहेका छन् ।

दुवै जना घाईते एउटै मोटरसाईकलमा सवार थिए । प्रहरीका अनुसार घाईतेमध्ये बृहस्पती थामीको अवस्था गम्भिर रहेको छ । उनको काठमाण्डौं स्थित ट्रमा सेन्टरमा उपचार भैरहेको छ । उनको टाउको लगायत शरिरका बिभिन्न भागमा चोट लागेको छ ।

बस्नेतको सामुदायिक अस्पतालमा उपचार भैरहेको छ । भीमेश्वर नगरपालिकाको क्षमावतीबाट सदरमुकाम चरिकोटतर्फ आउँदै गरेको बा ८६ प ४१३१ नम्बरको मोटरसाईकल र बिपरित दिशाबाट गैरहेको ३३०२—०११ प ९२४० नम्बरको मोटरसाईकल आपसमा ठोकिएर दुर्घट्ना भएको दोलखाका प्रहरी प्रवक्ता, प्रहरी निरीक्षक रेशम बोहराले जानकारी दिए। ठक्कर दिने मोटरसाईकल प्रहरीले नियन्त्रणमा लिएको जनाएको छ ।