संखुवासभा — संखुवासभामा पहिरोले ८ घर वगाउँदा ११ जना बेपत्ता भएका छन् । जिल्लाको सिलिचोङ गाउँपालिका–१ सिसुवाखोला स्थित ८ घर बगाउँदा उनीहरु बेपत्ता भएका हुन् । पहिरोमा परेका ४ जनाको भने जीवितै उद्धार गरिएको प्रहरीले जनाएको छ ।

वेपत्ता हुनेहरुमा राममान राई, हस्तीकुमारी, एन्जीला, नम्रता, गोरीमाया, प्रकृति, जुद्धबहादुर उत्तरकुमारी, नरमाया, हर्कधन र आईतमाया राई रहेका छन् । पहिरोमा परेर घाइते भएका गोवासिंह राई, भीमसरी राई,फुलमाया र भीमबहादुर राईको सकुशल उद्धार गरिएको हो । प्रहरीका अनुसार पहिरोले राममान राई, जुद्धबहादुर, माने, जुद्धबहादुर गैरी, नगमाया, सन्दिप, भीमबहादुर, शिवधन र हर्कधन राईको घर बगाएको छ ।

अविरल वर्षापछि आइतबार बिहान गएको पहिराले सिसुवाखोलाको बेसिन्दा गाउँ बगाएको हो । घटनास्थलमा प्रहरी र स्थानीयले उद्धार कार्य जारी राखेका छन् ।

सदरमुकाम खाँदबारीबाट पनि सेनाको बराह दल गुल्म, सशस्त्र प्रहरी र प्रहरी निरीक्षक सन्तोष राईको टोली विपत् व्यवस्थापन, खोज तथा उद्धार सामाग्रीसहित घटनास्थल पुग्दैछ ।