काठमाडौं । नेपाल पत्रकार महासंघको महाधिवेशनमा नेपाल प्रेस युनियन र प्रेस चौतारीको संयुक्त प्यानल चुनाव लड्ने भएका छन् । कांग्रेस निकट प्रेस युनियन र एमाले निकट प्रेस चौतारीले गठबन्धन गरेर संयुक्त उम्मेदवारी दिएका हुन् ।
यही मंसिर २८ गते हुने महासंघको महाधिवेशनका लागि अध्यक्षसहित १३ सदस्यीय पदाधिकारीमा कांग्रेस–एमाले निकटले साझा उम्मेदवारी दिएका हुन्।
शुक्रबार बिहान ११ बजेदेखि अपराह्न ४ बजेसम्म उम्मेदवारी दर्ताको कार्यक्रम थियो।
कांग्रेसनिकट प्रेस युनियनले अध्यक्ष एमालेनिकट प्रेस चौतारीलाई छाडेर अधिकांश पदाधिकारीमा उम्मेदवारी दिएको छ। चौतारीले अध्यक्षसहित ५ पदाधिकारी र युनियनले वरिष्ठ उपाध्यक्षसहित ८ पदाधिकारी लिने सहमति बनेको हो।
युनियनले वरिष्ठ उपाध्यक्षमा दीपक आचार्य, समावेशी उपाध्यक्षमा उमिद बागचन्द, महासचिवमा रामप्रसाद दाहाल, सचिवमा रमेश खतिवडा, सोनी शर्मा, प्रकाश धौलाकोटी, बैकुण्ठ पराजुली र अशोक तिवारीलाई उम्मेदवार बनाएको प्रेस युनियनका उपाध्यक्ष नकुल अर्यालले सेतोपाटीलाई जानकारी दिए।
यस्तै प्रेस चौतारीबाट अध्यक्षमा निर्मला शर्मा, महिला उपाध्यक्षमा नितु पण्डित, कोषाध्यक्षमा रामकृष्ण ज्ञवाली, समावेशी सचिवमा सविन प्रियासन र लेखा समिति सभापतिमा उम्मेदवारी परेको प्रेस चौतारीका सचिव राजेश राईले जानकारी दिए।
महासंघमा कांग्रेस(एमालेले प्रदेश र जिल्ला पनि भागबन्डा गरेका छन्। कोशी, मधेस, कर्णाली र उपत्यका अध्यक्ष प्रेस चौतारीले लिने र बागमती, गण्डकी, लुम्बिनी, सुदूरपश्चिम, एसोसिएट र प्रतिष्ठान अध्यक्ष प्रेस युनियनले लिने सहमति छ।
महासंघका ४३ जिल्ला शाखा अध्यक्ष प्रेस युनियनले र ३४ जिल्ला अध्यक्ष प्रेस चौतारीले लिने सहमति भएको हो।
महासंघ अध्यक्षमा नेकपा (माओवादी केन्द्र) निकट प्रेस सेन्टरबाट अध्यक्षमा कमल गिरीले उम्मेदवारी दिएका छन्। अहिले महासचिव रहेका रोशन पुरीले वरिष्ठ उपाध्यक्षमा उम्मेदवारी दिएका छन्। माओवादीले नेकपा (एकीकृत समाजवादी) र स्वतन्त्रसँग गठबन्धन गरी उम्मेदवारी दिएको छ।
साथै महिला उपाध्यक्षमा गंगा बराल, महासचिवमा लेखनाथ न्यौपाने, कोषाध्यक्षमा रामकृष्ण अधिकारी, सचिवमा उत्तर विष्ट, लेखा समिति संयोजक मणि दाहालको उम्मेदवारी परेको छ।
