चौतारा । नेकपा एमाले अध्यक्ष एवं पुर्व प्रधानमन्त्री केपी शर्मा ओलीलाई माओवादी केन्द्रका नेताहरुले सिन्धुपाल्चोकमा स्वागत गरेका छन् । माओवादी बागमती प्रदेश अध्यक्ष सरल सहयात्री (पौडेल) लगायतका नेताहरुले एमाले अध्यक्ष ओलीलाई स्वागत गरेका हुन् ।
बैतडीको झुलाघाटदेखि पाँचथरको चिवाभञ्ज्याङसम्म ‘समृद्धिका लागि संकल्प यात्रा’ मा रहेको अध्यक्ष ओलीसहितको टोली सिन्धुपाल्चोकको सुकुटे आईपुग्दा माओवादी नेताहरु स्वागतका लागि पुगेका थिए । स्वागतका क्रममा दुबै पार्टीका नेताहरुले आपसमा हार्दिकता प्रकट गरे ।
स्वागत गरेको फोटो माओवादी नेता पौडेलले सामाजिक संजालमा पनि पोष्ट गरेका छन् । उक्त स्वागतलाई सामाजिक संजालमा धेरैले राजनीतिक संस्कारका रुपमा सकारात्मक टिप्पणी गरेका छन् ।
‘समृद्धिका लागि संकल्प यात्रा’ कार्यक्रम अन्तर्गत धुलिखेलबाट दोलखा आउने क्रममा उनीहरुबीच बीच बाटोमा भेट भएको हो । चरिकोटमा आयोजित कार्यक्रमलाई सम्बोधन गरी अध्यक्ष ओली रामेछापको मन्थली पुगेर बास बस्ने कार्यक्रम रहेको एमालेले जनाएको छ ।
