काठमाडौं । मोटरसाइकल चोरी गरेको आरोपमा प्रहरीले काभ्रे र सिन्धुपाल्चोकका दुई जनालाई पक्राउ गरेको छ । काठमाडौं उपत्यकामा मोटरसाईकल चोरी गर्ने कार्यमा संलग्न भएको आरोपमा प्रहरीले सिन्धुपाल्चोकको बाह्रबिसे नगरपालिका–३ धार्पा घर भई हाल ललितपुरको भैसेपाटी बस्ने २५ वर्षीय विजय भन्ने लोकबहादुर पाख्रिन र काभ्रेको तिमाल गाउँपालिका–७ धुल्खु घर भई हाल बौद्ध नयाँबस्ती बस्ने २८ वर्षीय हेमा भन्ने सुजन तामाङलाई पक्राउ गरेको हो ।
उपत्यकाको विभिन्न स्थानहरुबाट मोटरसाइकलहरू चोरी हुने गरेको उजुरीको आधारमा काठमाडौं उपत्यका अपराध अनुसन्धान कार्यालयको टोलीले उनीहरुलाई पक्राउ गरेको हो ।
अपराध अनुसन्धान कार्यालयका अनुसार विजय भन्ने लोकबहादुर प्राखिनलाई भैंसेपाटीबाट पक्राउ गरी सोधपुछ गर्दै जाँदा सुजन तामाङ पक्राउ परेका हुन् । पक्राउ परेका उनीहरुलाई थप अनुसन्धानका लागि प्रहरी वर्त चापागाउँ पठाइएको प्रहरीले जनाएको छ ।
