चरिकोट । दोलखाको कालिञ्चोक गाउँपालिका–८, स्थित हाम्रो साना किसान कृषि सहकारी संस्थाको अध्यक्षमा होम पाठक चयन भएका छन् । शनिवार सम्पन्न प्रथम साधारण सभाले पाठकको अध्यक्षतामा १३ सदस्यीय सञ्चालक समिति चयन गरेको हो । सञ्चालक समितिको उपाध्यक्षमा बद्रीनाथ शिवाकोटी, सचिव गुरु प्रसाद खरेल, कोषाध्यक्षमा तुलसा बसेल चयन भएका छन् ।
यसैगरी सदस्यहरुमा लक्ष्मी सेढाँई शिवाकोटी, उर्मिला भारती, सुन्दर श्रेष्ठ, रामकाजी शिवाकोटी, सावित्रा आचार्य, शान्ता आचार्य खत्री, राम बहादुर बस्नेत, गोकर्ण शिवाकोटी र कालि प्रसाद शिवाकोटी रहेका छन् । कार्यक्रमका प्रमुख अतिथि कालिञ्चोक गाउँपालिका अध्यक्ष अर्जुन प्रसाद शिवाकोटीले कालिञ्चोक गाउँपालिकालाई कृषि नमुना पालिकाको रुपमा विकास गर्ने गरी योजना बनाएको बताए । शिवाकोटीले गाउँपालिकामा उत्पादन भएका कृषिजन्य सामग्रीको लागि बजार व्यवस्थापनको जिम्मा लिनेसमेत प्रतिवद्धता पनि व्यक्त गरे । कार्यक्रममा गाउँघर साना कृषि सहकारी संस्था मेलुङका अध्यक्ष श्रीराज पोखेल लगायतले मन्तव्य व्यक्त गरेका थिए ।
कार्यक्रममा सचिव गुरु प्रसाद खरेलले संस्थाको प्रगति प्रतिवेदन र कोषाध्यक्ष तुलसा बसेलले आर्थिक प्रतिवेदन प्रस्तुत गरे । कालिञ्चोक गाउँपालिका वडा नम्बर ७, ८ र ९ कार्यक्षेत्र रहेको उक्त सहकारीमा हाल ३ सय जना सदस्य रहेका छन् । विगत ३ महिना अघि तदर्थसमिति गठन गरी संचालनमा आएको संस्थाले प्रथम साधारणसभा मार्फत नयाँ संचालक समिति चयन गरेको हो ।
मुख्य कार्यालय कालिञ्चोक गाउँपालिका वडा नं ८ मा स्थापना गरेको उक्त सहकारीले किसानको हितमा बिभिन्न कार्यक्रम संचालन गर्ने जनाएको छ ।
