काठमाडौँ । काठमाडौं जिल्ला अदालतले ठगी, लिखत कीर्ते, सहकारी ठगी र संगठित अपराधसम्बन्धी कसूरमा ६ जनालाई पुर्पक्षका लागि थुनामा पठाएको छ । मुख्य आरोपित पृथ्वीबहादुर शाह, उनका भाइ विजयविक्रम शाहसहित ६ जनालाई पुर्पक्षका लागि थुनामा पठाएको हो ।

जिल्ला अदालत, काठमाडौंले शाहसहित ६ जनालाई पुर्पक्षका लागि थुनामा पठाउने आदेश दिएको नेपाल प्रहरी केन्द्रीय अनुसन्धान ब्युरो (सीआईबी) का प्रवक्ता एसपी सञ्जयसिंह थापाले जानकारी दिए । ठगी, लिखत कीर्ते, सहकारी ठगी र संगठित अपराधसम्बन्धी कसुरमा पक्राउ परेका ७ प्रतिवादीमध्ये भक्तपुरकी २४ वर्षीया विनिता तामाङ ५० हजार रुपैयाँ धरौटीमा छुटेकी छन् । 

अदालतको आदेशअनुसार पृथ्वीबहादुर शाह र उनका भाइ विजयविक्रम शाहलाई डिल्लीबजार कारागार, अनुप खड्का, चक्रबहादुर खत्री, रुक्मांगत काफ्ले र रंगबहादुर साउदलाई पुर्पक्षका लागि सुन्धारास्थित केन्द्रीय कारगार पठाएको छ । ठगी, लिखत कीर्ते, सहकारी ठगी र संगठित अपराधसम्बन्धी कसुरमा संलग्न अन्य १३ जना फरार छन् ।

अमेरिकामा अनलाइनमार्फत ठगी गरेको रकम नेपाल ल्याएको आरोपमा शाहलाई सीआईबीले पक्राउ गरेको थियो । उनीहरूविरुद्ध ब्युरोमा २४ वटा उजुरी परेको छ । पृथ्वीबहादुर शाहको समूहमा रहेका व्यक्तिहरुले संगठित रुपमा अवैध सम्पत्ति आर्जन गर्ने उद्देश्यले २४ भन्दा बढी कम्पनीहरु स्थापना गरेको, कम्पनीको उद्देश्यविपरीत आधिकारिक निकायबाट विदेशी लगानी भित्र्याउने अनुमति नलिई विदेशी लगानी भित्र्याएको भन्ने सम्बन्धमा विदेशी नागरिकहरुलाई ‘एन्टी भाईरस अपडेट’, ‘अमेजन’ को बिल भुक्तानी, ‘जीक स्क्वाड’, ‘क्वीक बुक्स’ समेतको निउँमा इमेलमार्फत सम्पर्क स्थापित गरेको पाइएको छ । उनीहरूले ‘रिमोट एक्सेस’बाट पीडितहरुको डिभाइसमार्फत बैंक एकाउन्टमा पहुँच बनाएर खाताको रकम नेपाल र थाइल्याण्ड पठाएको सीआईबीले जनाएको छ ।

शाहको समूहले क्यान्सर, अल्जाइमर पीडित र ज्येष्ठ नागरिकहरुलाई लक्षित गरी ठगी गर्ने, पीडितहरुलाई ‘मनी लाउन्डरिङ युनिट’ले कारबाही गर्छ र कानुनी उल्झनमा परिन्छ भनी कानुनी प्रक्रियामा नजान धम्की दिने गरेको अनुसन्धानमा खुलेको सीआईबीका प्रवक्ता एसपी थापाले बताए । पीडितलाई फोन सम्पर्क गरी गतिविधिमाथि नियमित निगरानी गर्ने, अन्तराष्ट्रिय सिस्टम भएकोले ‘रिमोट एक्सेस’ दिनुपर्छ भनि पीडितलाई विश्वास दिलाउने गरेको, डिभाइसमा नक्कली बैंक स्टेटमेन्ट पठाई झूटो रकम जम्मा भएको देखाई सोही रकम फिर्ता गर्न लगाई ठगी गर्ने गरेको पाइएको छ ।