चरिकोट । दोलखाको कालिञ्चोक गाउँपालिका-९, सुन्द्रावती स्थित कटुवाचौरका आगलागी पीडितहरुको लागि प्रवासमा रहेका युवाहरुको पहलमा आर्थिक सहयोग जुटाईएको छ । रोजगारी र अन्य कामको शिलशिलामा बिभिन्न मुलुक रहेका युवाहरूको पहल र सक्रियतामा आगलागी पीडितहरुको लागि दुई लाख ९२ हजार २ सय ११ रुपैयाँ बरावर आर्थिक सहयोग जुटाईएको हो ।

उक्त सहयोग जुटाउन दक्षिण कोरिया, बेलायत, जापान लगायतका मुलुकमा रहेका युवाहरूले सामाजिक संजाल फेसबुकमा क्याम्पियन चलाएका थिए । संकलन भएको आर्थिक सहयोग सोमवार पीडितहरुलाई हस्तान्तरण गरिने दक्षिण कोरियामा रहेर राहत जुटाउन भूमिका खेलेका अभि थापाले जानकारी दिए । बिभिन्न मुलुकमा रहेका ७५ जना युवाहरुले आगलागी पीडितहरुलाई आफ्नो तर्फबाट सहयोग गरेका छन् ।

गत माघ १८ गते राती भएको आगलागीबाट सुन्द्रावती कटुवाचौरका  सन्तोष सेढाई, दुर्गा दहाल, चित्र प्रसाद सेढाई, स्वस्तानी खड्का, शंकर ओली, पुस्कर ओली, रुद्र बहादुर ओली, गोपिलाल थामी, राम बहादुर थामीको घर जलेर पुर्ण रुपमा नष्ट भएको थियो । आगलागीबाट धनमाल र पशुचौपाया गरी करोडौंको क्षति भएको थियो ।