हेटौंडा । बागमती प्रदेशको मुख्यमन्त्री शालिकराम जम्कट्टेलले विश्वासको मत लिएका छन् । ११० सदस्यीय प्रदेशसभामा उनलाई १०५ सांसदले विश्वासको मत दिएका छन् । प्रदेश सभाका सभामुख भुवन पाठकले प्रस्तावको पक्षमा १०५ र विपक्षमा ३ मत खसेको सदनलाई जानकारी दिए । १ जना सांसद भने उपस्थित भएनन् ।
मुख्यमन्त्री जम्कट्टेललाई प्रदेशसभाको सबैभन्दा ठूलो दल नेपाली कांग्रेसका सांसदहरुले पनि विस्वासको मत दिएका छन् । प्रदेश सभामा प्रतिनिधित्व गर्ने सातमध्ये ६ दलले विस्वासको पक्षमा मत दिएका छन् ।
नेपाली कांग्रेस कार्यसम्पादन समितिको मंगलबार बिहान बसेको बैठकले मुख्यमन्त्री जम्कट्टेललाई विश्वासको मत दिन संसदीय दललाई निर्देशन दिने निर्णय गरेको थियो । मुख्यमन्त्री नियुक्त भएको नवौं दिनमा मुख्यमन्त्रीले विस्वासको मत लिएका हुन् ।
प्रदेश सभामा ३ जना मात्र सांसद रहेको नेपाल मजदुर किसान पार्टी (नेमकिपा) ले भने विपक्षमा मतदान गरेको छ । अब बागमती प्रदेश सभामा नेमकिपा मात्र प्रतिपक्षी दलको रुपमा रहेको छ ।
