काठमाण्डौं - यस वर्ष सञ्चालित माध्यामिक शिक्षा परीक्षा (एसईई) को नतिजा असार मसान्तभित्र प्रकाशन गर्ने तयारी भैरहेको छ । राष्टिय परीक्षा बोर्डका अनुसार नतिजा असार मसान्तसम्म निकाल्ने गरी काम भईरहेको छ । यसैबीच एसइईको उत्तरपुस्तिका अब प्रदेश स्तरमा जाँच हुने भएको छ ।
प्रदेशले विद्यार्थीको प्राप्ताङ्क सफ्टवेयर मार्फत राष्ट्रिय परीक्षा बोर्डमा पठाउने र बोर्डले रुजु गरी नतिजा प्रकाशन गर्नेछ । बोर्डले यो वर्ष प्रदेश परीक्षा समिति बनाएर परीक्षा सञ्चालन, अनुगमन, निरीक्षण, परीक्षा केन्द्रका मापदण्डहरु निर्धारण, उत्तरपुस्तिका संकलन, परीक्षण, अंक चढाउन सक्ने अधिकार दिएको छ ।
पाठ्यक्रममा आधारभूत तहको अन्तिम परीक्षा स्थानीय सरकारले, कक्षा १० को अन्तिम परीक्षा प्रदेशले र कक्षा १२ को परीक्षा राष्ट्रिय परीक्षा बोर्डले लिने भन्ने उल्लेख छ । तर यस अनुसार शिक्षा ऐन संशोधन नभएकाले प्रश्नपत्र बोर्डले बनाउने र प्रदेशलाई पनि केही अधिकार दिने गरी काम गरेको बोर्डका अध्यक्ष महाश्रम शर्माले बताउनुभयो ।
