चरिकोट - दोलखाको शैलुङ गाउँपालिकामा घरमा आगलागी भएपछि निसास्सिएर एक जनाएको मृत्यु भएको छ । शैलुङ गाउँपालिका वडा नम्बर १, का ८५ वर्षीया निदकुमारी मगरको निसास्सिएर मृत्यु भएको हो ।  सोमवार बिहान करिब ३ बजे विद्युत सर्ट भएर घरमा आगलागी भएको र झ्याल ढोका पनि बन्द रहेका कारण उनको मृत्यु भएको प्रहरीले जनाएको छ ।

विहान उज्यालो नहुँदै घरमा आगलागी भएका कारण वृद्धाको उद्धार गर्न नसकिएको स्थानीयले बताएका छन् । स्थानीयका अनुसार ती बृद्धा छुट्टै कोठामा सुत्ने गरेकी थिईन् । घरमा आगलागी भएपछि उनलाई छिमेकीले उद्धार गर्ने प्रयास गरेका थिए । तर उनको घरभित्रै निसास्सिएर मृत्यु भैसकेको थियो ।

घटनास्थलमा प्रहरी टोली पुगेर सदरमुकाम चरिकोट स्थित अस्पताल ल्याउँदैछ । आगलागीका कारण घरमा क्षति पुगेको छ भने एउटा बाख्राको पाठा र ३ वटा कुखुरा जलेको प्रहरीले जनाएको छ ।