चरिकोट – जिल्ला समन्वय समिति दोलखाको पदाधिकारी तथा सदस्यका लागि हुने निर्वाचनमा १९ जनाको उम्मेदवारी परेको छ । प्रमुख एक, उपप्रमुख एक, र ७ जना सदस्य गरी जम्मा ९ जना पदाधिकारी तथा सदस्य पदका लागि १९ जनाले मनोनयन दर्ता गराएका हुन् । दोलखाका मुख्य निर्वाचन अधिकृत कवि प्रसाद न्यौपानेका अनुसार प्रमुखमा दुई, उप प्रमुखमा एक जना स्वतन्त्रसहित ३ जनाको उम्मेदवारी परेको छ ।
उपप्रमुखमा स्वतन्त्र उम्मेदवारी दिनेमा तामाकोसी गाउँपालिका वडा नम्बर २ का वडा सदस्य नानीकाजी तामाङ रहेका छन् । कांग्रेसबाट टिकट नपाएपछि उनले स्वतन्त्रबाट वडा सदस्य जितेका थिए । यस्तै ७ जना सदस्यका लागि १४ जनाले मनोनयन दर्ता गराएका छन् ।
सदरमुकाम चरिकोट स्थित मुख्य निर्वाचन अधिकृतको कार्यालयमा पुगी सत्तारुढ गठबन्धन दलहरुले संयुक्त र नेकपा एमालेले एकल उम्मेदवारी दर्ता गराएको हो । गठबन्धन दलहरुबीच पुर्व समझदारी अनुसार जिससको प्रमुखमा माओवादी केन्द्रबाट बर्जुराम घतानी (कृष्ण) उपप्रमुखमा एकिकृत समाजवादीका दोर्जे शेर्पा र ७ जना सदस्यहरुमा कांग्रेसका उम्मेदवारले मनोनयन दर्ता गराएका हुन् ।
नेपाली कांग्रेसका सदस्यमा उम्मेदवारी दिनेमा कृष्ण श्रेष्ठ, कल्पना थामी, अनिल तमाङ, निलम ठकुरी, मेनुका चौंलागाई, सन्तेन्जु शेर्पा र टसि शेर्पा रहेका छन् । स्थानीय तहको निर्वाचनमा जिरी नगरपालिका र बैतेश्वर गाउँपालिकामा माओवादी केन्द्रले धोका दिएको भन्दै प्रमुख आफुले पाउनुपर्ने दाबी गरेपनि उक्त अडानबाट कांग्रेस पछि हटेपछि पुर्व सहमति अनुसार मनोनयन दर्ता गरिएको हो ।
यसैबीच नेकपा एमालेले जिसस पदाधिकारी तथा सदस्य पदका लागि एकल मनोनयन दर्ता गराएको छ । एमालेबाट प्रमुखमा ऋषिकेश उप्रेती र उपप्रमुखमा गोमा केसीले मनोनयन दर्ता गराएका छन् । यसैगरी सदस्यहरुमा जिरीबाट जंके बहादुर श्रेष्ठ, तामाकोसीबाट नरबहादर कार्की, मेलुङबाट कमल लकेन्द्री, शैलुङबाट नवराज कार्की, महिला तथा सिमान्तकृतबाट देवी बसेल, महिला सदस्य कविता मुग्राती र एकमाया भुजेलले उम्मेदवारी दिएका छन् ।
जिल्ला अध्यक्ष नरबहादुर श्रेष्ठले एमालेले आफ्नै शक्तिमा विस्वास गर्ने भएकाले एकल उम्मेदवारी दर्ता गराएको बताए ।
जिसस पदाधिकारी तथा सदस्यहरुको लागि मतदान भने आगामी असार १ गते हुनेछ । निर्वाचन कार्यालयले भोली उम्मेदवारहरुको अन्तिम नामावली प्रकाशन गर्ने छ भने पर्सी निर्वाचन चिन्ह प्रदान गर्ने जनाएको छ ।
निर्वाचनमा जिल्लास्थित ९ स्थानीय तहका प्रमुख र उपप्रमुख गरी १८ जनाले मतदान गर्न पाउनेछन् । जसमा नेकपा एमालेको ७, नेपाली कांग्रेसको ६, नेकपा माओवादी केन्द्रको ४ र नेकपा एसको १ मत रहेको छ ।
कतिपय जिल्ला समन्वय समितिमा फरक समिकरण बनेपनि दोलखामा सत्तारुढ गठबन्धन दलहरुले पुर्व सहमति कार्यान्वयन गरेर जाने समझदारी गरेका हुन् । गत वैशाख ३० गते सम्पन्न स्थानीय तहको निर्वाचनमा पनि सत्तारुढ गठबन्धन र एमालेबीच मुख्य प्रतिस्पर्धा भएको थियो ।
