काठमाण्डौं - चर्चित फिल्म ‘कबड्डी ४, द फाइनल म्याच’को शीर्ष गीत ‘केशरी’ ले बजार तताएको छ । एसडी योगीको संगीत र स्वरमा रहेको गीतमा फिल्मका दुई मुख्य पात्र सौगात मल्ल र मिरुना मगर फिचर्ड छन् । गीतमा रामअविरल विष्टको शब्द र रिकेश गुरुङको एरेन्ज छ । यो गीतमा सौगातले मिरुनालाई फकाउन प्रयास गरिरहेको भाव समेटिएको छ । ‘तपाईं मेरो पहिलो लभ नभएपनि अन्तिम लभ चाहिं अवश्य हो’ मिरुनालाई फकाउँदै सौगातले भनेका छन् । 

गीतमा तल्लो मुस्ताङको हिमाली सौन्दर्यलाई चित्रण गरिएको छ । सौगात र मिरुनासहित दयाहाङ राईको मुख्य भूमिका रहेको फिल्म अहिले देशभर प्रदर्शनमा छ । रामबाबु गुरुङ निर्देशित फिल्ममा यसपटक मिरुनाको प्रवेश भएको छ । विशाल गुरुङ, सुष्मा गुरुङ, मधु मिजार र मणिराम पोखरेलले संयुक्त रुपमा निर्माण गरेको फिल्मले आफ्नै रेकर्ड तोड्न सफल भएको छ ।