चरिकोट – दोलखाको भिमेश्वर नगरपालिकामा गाडिको ठक्करबाट मोटरसाइकल चालकको मृत्यु भएको छ । जिल्लाको भिमेश्वर नगरपालिका वडा नम्बर ४ गौरीशंकर बाल गृह नजिकैको सडकमा योद्धा गाडिले मोटरसाइकललाई ठक्कर दिदा मोटरसाइकल चालकको मृत्यु भएको हो ।

आज विहान दुर्घटनामा परि जिल्लाको भिमेश्वर नगरपालिका वडा नम्बर ४ जिलुका ३३ बर्षिय उमेश श्रेष्ठको मृत्यु भएको हो । चरिकोटबाट तामाकोशी जादै गरेको प्रदेश नम्बर ३ – ०१०२४ च ५९१९ नम्बरको योद्धा गाडि र चरिकोट तर्फ आउदै गरेको बा ७५ प ४५२१ नम्बरको मोटरसाइकल एकआपसमा ठोक्किएर दुर्घटना भएको जिल्ला प्रहरी कार्यालयका प्रहरी निरीक्षक  शुसिल केसीले जानकारी दिनुभयो ।

उहाका अनुसार दुर्घटनामा घाइते भएका श्रेष्ठको पशुपति चौलागाई स्मृति अस्पतालमा उपचारको क्रममा मृत्यु भएको हो । गाडि सहित चालकलाई प्रहरीले नियन्त्रणमा लिएको र घटनाको थप अनुुसन्धान भइरहेको प्रहरीले जनाएको छ ।