चरिकोट - दोलखाको वैतेश्वर गाउँपालिका वडा नम्वर ८ को अध्यक्षमा निर्वाचित शान्त बहादुर जिरेलले शुक्रवार पदभार ग्रहण गरेका छन् । वैशाख ३० गते सम्पन्न स्थानीय तह निर्वाचनमा जिरेल नेकपा एमालेको तर्फबाट वडा अध्यक्षमा निर्वाचित भएका थिए ।
वडा कार्यालयमा आयोजित एक कार्यक्रमकाबीच जेष्ठ नागरिकहरुलाई पौष्टिक आहार (हरलिक्स) वितरण गर्दै जिरेलले पदभार ग्रहण गरेका हुन् । पदभार सम्हाल्दै अध्यक्ष जिरेलले वडाबाट सम्पादन हुने सेवा प्रवाह छिटो छरितो र सहज बनाउने प्रतिबद्धता जनाउँदै सबैसँग सहकारी गरी विकास निर्माणको काम अघि बढाउने बताए ।
कार्यक्रममा नयाँ जनप्रतिनिधिको स्वागतसँगै पुर्व वडा अध्यक्ष रमेश अधिकारी सहित सदस्यहरुलाई विदाई गरिएको थियो । पुर्व वडा अध्यक्ष तथा सदस्यहरुलाई पाँच वर्षको अवधिमा पुर्याएको योगदानको कदर गर्दै मायाको चिनो प्रदान गरियो । कार्यक्रममा वडाका जेष्ठ नागरिकहरुलाई पौष्टिक अहार हरलिक्स वितरण गरिएको थियो ।
वैशाख ३० गतेको स्थानिय तहको निर्वाचनमा वैतेश्वर ८ क्षत्रपामा नेकपा माओवादी र नेपाली काङग्रेसलाई पराजित गर्दै ५४० मत सहित जिरेल वडा अध्यक्षमा निर्वाचित भएका हुन् ।
