चरिकोट – नेकपा एमालेले कालिञ्चोक गाउँपालिकाको ९ वटै वडाहरुको अधिवेशन सम्पन्न गरी नयाँ नेतृत्व चयन गरेको छ । यही कात्तिक ६ र ७ गतेसम्म वडा अधिवेशनहरुबाट सबै वडाहरुमा अध्यक्षसहितको नयाँ वडा कमिटि सर्वसम्मत रूपमा निर्वाचित भएका हुन् । नयाँ वडा कमिटिको नेतृत्वमा केही नयाँ र पुराना मिश्रित अनुहारहरु निर्वाचित भएका छन् ।
वडा नम्बर १ को अध्यक्षमा भक्त बहादुर थामी, वडा नम्बर २ को अध्यक्षमा विकास थामी, वडा नम्बर ३ को अध्यक्षमा बीर बहादुर बानिया चयन भएका छन् । यसैगरी वडा नम्बर ४ को अध्यक्षमा कुमार बस्नेत, वडा नम्बर ५ को अध्यक्षमा सन्तोष खड्का, वडा नम्बर ६ को अध्यक्षमा ओम बहादुर थापा, वडा नम्बर ७ को अध्यक्षमा दिपक राउत, वडा नम्बर ८ को अध्यक्षमा यज्ञ भारती र वडा नम्बर ९ को अध्यक्षमा कृष्ण पकुवाल रहेका छन् ।
एमाले विधान अनुसार नवनिर्वाचित नेतृत्वले आगामी तीन वर्षसम्म कार्यभार सम्हाल्ने छ ।
नेकपा एमाले कालिञ्चोक गाउँपालिका संगठन कमिटीका अध्यक्ष ईश्वरी दाहालले सबै वडाहरुमा उत्साहजनक रुपमा अधिवेशन सम्पन्न भएको र सर्वसम्मत रुपमा नयाँ नेतृत्व निर्वाचित भएको जानकारी दिए ।
