काठमाडौं - स्रोत नखुलेको ३० लाख ७ हजार रुपैयाँ नगदसहित प्रहरीले रामेछाप र काभ्रेका दुई जनालार्य पक्राउ गरेको छ । पक्राउ पर्नेमा काभ्रेको चौरीदेउराली गाउँपालिका–३ घर भई काठमाडौंको कुलेश्वरमा फलफूल पसल गर्ने ३४ वर्षीय मीनप्रसाद गौतम र रामेछापका सुनापती गाउँपालिका–१ घर भई काठमाडौंको कालीमाटीमा डेरा गरी बस्ने २१ वर्षीय रमेश तिमिल्सना रहेका छन् ।
उनीहरुलाई काठमाडौैंको कुलेश्वर फलफूल बजारबाट नियन्त्रणमा लिएको महानगरीय प्रहरी परिसर काठमाडौंले जनाएको छ । फलफूल व्यापारी मीनप्रसादले कुलेश्वर फलफूल बजारमा रहेको पसलमा हुण्डी कारोबार गर्छन् भन्ने सूचना पाएपछि प्रहरीले उनीहरुको खोजी सुरु गरेको थियो ।
प्रहरी वृत्त कालीमाटीबाट खटिएको टोलीले खानतलासी गर्दा सोही पसलमा काम गर्ने कर्मचारी रमेशले झोलामा राखेको ३० लाख ७ हजार रुपैयाँ नगद फेला परेको प्रहरीले जनाएको छ ।
फेला परेको रकमको स्रोत खुलाउन नसकेपछि प्रहरीले उनीहरुलाई पक्राउ गरेको हो । उनीहरुलाई थप अनुसन्धान तथा कारबाहीका लागि राजस्व कार्यालय हरिहर भवन पठाईएको छ ।
